Category: Latest News

Hukumar Sibil Difens a Jihar Gombe, ta sanar da tura jami’anta guda 700 zuwa sassan jihar daban-daban, domin tabbatar da tsaro yayin bukukuwan salla ƙarama.

Wannan matakin na ƙunshe ne cikin wata sanarwa da jami’in hulɗa da jama’a na rundunar, Buhari Sa’ad, ya fitar a madadin kwamandan jihar, Jibrin Idris.

Rundunar ta bayyana cewa an tsara aikin ne na musamman tsakanin ranakun 19 zuwa 21 ga watan Maris, 2026.

Kwamandan ya bayyana cewa an riga an jibge jami’an a wuraren da ake ganin sun fi buƙatar kulawa, ciki har da filin Idi da hanyoyin da za a bi domin yin hawan salla.

Ragowar wuraren sun haɗa da wuraren shaƙatawa, kasuwanni, tashoshin mota da manyan hanyoyin shige da fice na jihar.

Baya ga kare rayukan jama’a, Jibrin Idris, ya jaddada cewa rundunar za ta sanya idanu kan kadarorin gwamnati da na jama’a domin daƙile masu son yin amfani da lokacin wajen yin ɓarna.

Ya kuma tabbatar da cewa suna aiki kafaɗa-da-kafaɗa da sauran hukumomin tsaro domin tabbatar da doka da oda.

Yayin da yake jan kunnen jami’an da aka tura su gudanar da aiki da gaskiya da ƙwarewa, kwamandan ya kuma taya ɗaukacin al’ummar Musulmi murnar kammala azumin watan Ramadan.

Ya ƙarƙare da yin kira ga mazauna jihar da su gudanar da bukukuwan cikin lumana, sannan su kasance masu sanya idanu tare da kai rahoton duk wani ga jami’an tsaro mafi kusa da su.

Masu alaƙa

Shugaba Bola Ahmed Tinubu, tare da mai ɗakinsa, Oluremi Tinubu, sun samu kyakkyawar tarba a Birtaniya yayin wata muhimmiyar ziyara da suka kai.

Sarki Charles III ne, ya tarbi Tinubu a Windsor Castle, wanda ya zama ziyara ta farko daga Najeriya cikin shekaru 37.

A yayin ziyarar ta kwanaki biyu, manyan gidan sarautar Birtaniya sun tarbi Tinubu, ciki har da Sarauniya Camilla, Yarima William da Gimbiyar Catherine.

Ziyarar ta ƙunshi al’adun sarauta kamar faretin sojoji, hawa keken doki da sauransu.

An fara tarbar Tinubu da matarsa a Fairmont Windsor Park kafin daga bisani suka wuce Windsor Castle domin bikin tarbarsu a hukumance.

A wajen bikin, an yi gaisuwar ban girma ta sojoji tare da rera taken Najeriya da na Birtaniya.

A gefe guda Shugaba Tinubu ya duba jerin sojoji, yayin da Sarki Charles ke tsaye a bayansa, alamar kyakkyawar alaƙa tsakanin ƙasashen biyu.

Ga hotunan:

Masu alaƙa

Rundunar ‘yan sandan jihar Yobe ta nuna matuƙar tausayawa ga gwamnati da al’ummar Maiduguri, jihar Borno, bayan afkuwar fashewar bama-bamai da suka faru a ranar 16 ga Maris, 2026, da misalin ƙarfe 18:30 a wurare daban-daban a cikin Maiduguri.

A cikin wata sanarwa da kakakin rundunar SP Dungus Abdulkareema a ranar Talata 17 ga Maris 2026 ya fitar ya ce, rundunar ta yi kira ga mazauna jihar Yobe da su kwantar da hankalinsu, su yi taka-tsantsan, kuma su kasance cikin tsaro, musamman a ciki da kewayen al’ummominsu, wuraren jama’a da sauran wurare masu cunkoso.

Bayan taron majalisar tsaron Jiha da aka gudanar a fadar gwamnatin Jihar Yobe a ranar 16 ga Maris, 2026, wanda ya shafi dukkan hukumomin tsaro a jihar, an sanya tsauraran matakan tsaro a faɗin jihar kafin bukukuwan Sallah mai zuwa kamar yadda tun farko gwamnan Jihar Yobe Mai Mala Buni ya bada umarni akan hakan.

Kwamishinan ‘Yan Sanda, Emmanuel Ado, psc, fdc, ya umarci Kwamandojin yankuna, Jami’an ‘yan Sanda na Sashe, Sashen dabaru, da sashen leƙen asiri da su tabbatar da tsaro mai inganci a cibiyoyin ibada, wuraren shaƙatawa na jama’a, da sauran wurare masu muhimmanci kafin, lokacin da kuma bayan bukukuwan Sallah.

Ana ƙarfafawa jama’a da su yi aiki tare da hukumomin tsaro ta hanyar samar da sahihan bayanai game da harkokin mutane, motoci ko babura da ake zargi zuwa ofishin ‘yan sanda mafi kusa.

Ana kuma gargaɗin masu ababen hawa da sauran masu amfani da hanya da su guji tuƙi ba tare da kulawa ba da kan haifar da haɗari a lokacin bukukuwan domin tabbatar da tsaron jama’a.

Masu alaƙa

Gwamnatin Jihar Kano ta sanar da cewa Sarkin Kano, Muhammadu Sanusi II, shi ne zai jagoranci Hawan Sallar Idil-Fitr na wannan shekarar, yayin da ta fitar da tsauraran matakai domin hana ɓarkewar tarzoma a lokacin shagulgulan.

Gwamnatin ta bayyana cewa, wannan shawara wadda Gwamna Abba Kabir Yusuf ya amince da ita, ta biyo bayan rahotannin sirri ne da ke nuna yunƙurin wasu mutane na tada zaune tsaye a lokacin Sallar.

A cikin wata sanarwa da Kwamishinan Yaɗa Labarai da Al’amuran Cikin Gida, Ibrahim Abdullahi Waiya, ya fitar ranar Laraba, gwamnatin ta ce tana nan kan bakanta na kiyaye al’adun Kano, amma zaman lafiya da tsaro su ne a gaba.

A cewar sanarwar, Sarki Sanusi zai gudanar da Hawan Idi tun daga filin Sallar Idi na Kofar Mata, ta hanyoyin da aka ware zuwa Gidan Shettima, sannan ya ƙarƙare a Kofar Fatalwa ta fadar Sarki.

Sanarwar ta ƙara da cewa, za a gudanar da Hawan Nasarawa ta wani salo na daban ba tare da jerin gwanon dawakai ba, yayin da aka dakatar da Hawan Daushe da Hawan Fanisau, da Hawan Dorayi a halin yanzu domin tabbatar da tsaron jama’a.

Gwamnatin ta ce an umarci dukkan hukumomin tsaro da su tsananta sanya ido tare da tabbatar da ganin an bi waɗannan dokoki daki-daki kafin sallah, lokacin sallah da kuma bayan shagulgulan.

Haka kuma, ta buƙaci mazauna jihar da su kwantar da hankulansu, su kasance masu bin doka, sannan su ba hukumomin tsaro haɗin kai, tare da yin gargaɗi kan yaɗa labaran da ba a tantance ba.

Masu alaƙa

’Yan sa’o’i kaɗan bayan karɓar baƙuncin manyan jami’an gwamnati a taron buɗe baki (Iftar) a fadarsa, Sarkin Kano na 16, Muhammadu Sanusi II, ya gudanar da wata ganawar sirri da wata tawaga daga Gwamna Abba Kabir Yusuf.

Lamarin dai ya rura wutar hasashen matsayar jihar kan taƙaddamar sarautar da ake yi.

Kakakin Gwamnan, Sanusi Bature Dawakin Tofa ya tabbatar da ganawar a wani saƙo da ya wallafa a Facebook da safiyar ranar Laraba, inda ya ce an gudanar da ganawar ne a fadar Gidan Rumfa.

Ya bayyana cewa, waɗanda suka halarci taron sun haɗa da Sakataren Gwamnatin Jiha (SSG), Umar Ibrahim, Shugaban Ma’aikatan Gwamna, Sulaiman Wali Sani, da kuma shi kansa.

Dawakin Tofa ya rubuta cewa: “Jim kaɗan bayan buɗe baki a Fadar Sarki, tawagar Gwamnan ta yi wata ganawar sirri da Mai Martaba.”

Wannan na zuwa ne yayin da birnin Kano ke shirye-shiryen shagulgulan ƙaramar Sallah na Idil-Fitr da kuma gagarumin Hawan Sallah na tarihi.

Hawan Sallar, wanda tsohon al’ada ne da aka daɗe ana yi, ya shiga yanayin rashin tabbas biyo bayan maganganu masu karo da juna daga jami’an gwamnati kan ko za a yi shi a wannan shekarar, ganin yadda har yanzu akwai taƙaddamar shari’a tsakanin Sanusi II da Aminu Ado Bayero da ba a warware ba.

Duk da cewa Gwamna Yusuf ya mayar da Sanusi II kan mulki a shekarar 2024, Bayero na ci gaba da ƙalubalantar tsige shi a kotu, wanda hakan ya sa batun sarautar ke cikin ruɗani.

Masu alaƙa

Shugaban Najeriya, Bola Tinubu zai gana da Sarki Charles III a yau Laraba domin ƙarfafa dangantakar ƙasashen biyu da gano damar ƙarin zuba hannun jarin ’yan kasuwa.

Bola Tinubu da matarsa, Oluremi Tinubu, sun isa filin jirgin saman Stansted ranar Talata inda Sarki Charles zai karɓi Tinubu a gidan sarauta na tarihi na Windsor Castle kafin ya shirya liyafar ƙasa da ƙasa da yamma.

Birtaniya da Najeriya na da kyakkyawar alaƙa ta diflomasiyya, inda ƙasashen biyu suka ƙulla yarjejeniya ta haɗin kai a Nuwamba 2024 don ƙarfafa tattalin arziki da shige da fice da kuma tsaro kamar yadda majiyar BBC ta ruwaito.

An kuma tsara cewa, ranar Alhamis, Tinubu zai gana da  sabon Firaiministan Birtaniya Keir Starmer da ‘yan Najeriya da ke ƙasashen waje.

Masu alaƙa