ISIS ta kashe mutum 31, wasu 169 sun jikkata a masallacin Juma’a a Pakistan

Harin ƙunar baƙin wake a wani masallaci da ke Islamabad, babban birnin ƙasar Pakistan ya kashe akalla mutane 31 a ranar Juma’a, tare da jikkata wasu 169.

Harin da aka kai a masallacin na mabiya darikar Ahi’a shi ne mafi muni a babban birnin Pakistan tun harin bom da ya lalata otel ɗin Marriott a 2008.

Jami’an birnin sun ce mutanen da suka mutu sun kai 31 a masallacin Imam Bargah Qasr-e-Khadijatul Kubra da ke yankin Tarlai a gefen birnin, yayin da daruruwan mutane ke karɓar magani. An ce yawan mutanen da suka mutu na iya ƙaruwa.

Harin ya auku ne a yayin da ake tsaka da sallar Juma’a, lokacin da masallatai ke cike da masu ibada. “Mai harin ya tsaya a ƙofar masallacin sannan ya tayar da bam ɗin,” in ji wani jami’in tsaro ga kamfanin Dillancin Labarai na AFP.

Muhammad Kazim, mai shekaru 52, wanda ya halarci sallar, ya ce “wani mummunan fashewa” ya girgiza masallacin a lokacin da aka fara Sallah. Muna cikin ruku’u na farko, mun ji harbe-harbe,” in ji shi. “Kafin mu ɗaga kai daga ruku’u, sai bam ya tashi.”

Wani mai ibada mai suna Imran Mahmood ya shaida wa AFP cewa an yi musayar wuta tsakanin mai bam ɗin, wataƙila abokin sa, da masu tsaron masallacin.

“Mai harin ya yi ƙoƙarin shiga gaba, amma ɗaya daga cikin masu tsaro da ya jikkata ya harbe shi daga baya, ya same shi a cinyarsa,” in ji Mahmood. “Sai ya tayar da bam ɗin.”

Ƙungiyar ISIS ta ɗauki alhakin harin a yayin da Firayim Minista Shehbaz Sharif ya ce za a kamo waɗanda suka aikata harin kuma a hukunta su.

Wannan hari shi ne mafi muni a Islamabad tun watan Satumba 2008, lokacin da mutane 60 suka mutu a harin bam da ya lalata wani ɓangare na otel ɗin alfarma na Marriott.

Jikkata da Asibiti

Bayan harin, an kwantar da mutane da dama, ciki har da yara, a asibiti.

Masu jinya da jama’a sun taimaka wajen sauke waɗanda suka jikkata daga motocin asibiti, jikinsu jina-jina.

Abokai da ’yan uwa na waɗanda suka jikkata suna kuka yayin da aka kawo su zuwa sashen kulawar gaggawar asibiti mai tsaro sosai.

A wajen masallacin, ’yan jarida sun ga jami’an tsaro dauke da makamai, jini ya zuba a ƙasa, takalma, tufafi da gilashi sun watse.

Bidiyoyin da aka yada a kafafen sada zumunta sun nuna gawarwaki a ƙofar masallacin da kuma cikin masallacin.

Mataimakin Firayim Minista Ishaq Dar ya bayyana harin da cewa “mummunan laifi ne ga ɗan adam kuma karya ce ga ƙa’idodin Musulunci.”

Tasirin Tsaro da Rikice-rikice

Harin ya zo ne a daidai lokacin da sojojin Pakistan ke fama da ƙaruwar hare-haren ’yan tawaye a kudanci da arewa, kusa da iyakar Afghanistan.

Pakistan ƙasa ce mai rinjaye na Sunni, amma Shi’a suna tsakanin kashi 10 zuwa 15 cikin ɗari na yawan jama’a, kuma sun sha fuskantar hare-hare a yankin.

Hukumomin Pakistan sun ce ’yan tawaye na Balochistan da Taliban na Pakistan da sauran ’yan jihadi a Khyber Pakhtunkhwa suna amfani da ƙasar Afghanistan a matsayin mafaka.

Gwamnatin Taliban ta Afghanistan ta musanta zargin Pakistan sau da dama. Dangantakar ƙasashen biyu ta yi tsami, inda ake yawan samun arangama a kan iyaka.

Hari mafi muni a Islamabad kafin wannan shi ne a watan Nuwamba, a wajen kotu, inda ya kashe mutane 12, wanda ya kasance na farko cikin kusan shekaru uku.

A Balochistan, hare-haren da ’yan tawaye suka ɗauki alhaki a makon da ya gabata sun kashe fararen hula 36 da jami’an tsaro 22, lamarin da ya jawo martanin sojoji inda aka ce an kashe kusan ’yan tawaye 200.

Masu alaƙa