Rasha ta yi Allah-wadai da kashe shugaban tsaron Iran Larijani

Kasar Rasha ta yi Allah-wadai da kisan shugaban tsaron ƙasar Iran, Ali Larijani bayan da wasu jami’ai a Tehran suka lashi takobin ɗaukar fansa kan mutuwarsa a wani harin sararin samaniya da Isra’ila ta kai.

Larijani ya taɓa ganawa da Shugaban Rasha Vladimir Putin a fadar Kremlin a watan Janairu, daidai lokacin da jiragen yaƙin ruwa na Amurka ke nufar Iran gabanin fara fafatawar Amurka da Isra’ila ta sararin samaniya da aka ƙaddamar a karshen watan Fabrairu.

“Muna yin tir da Allah-wadai da ayyukan da aka yi niyyar cutar da lafiya, da ma kisan shugabannin kasar Iran mai cin gashin kanta. Muna Allah-wadai da irin waɗannan ayyuka,” in ji kakakin fadar Kremlin, Dmitry Peskov, yayin da yake tattaunawa da manema labarai.

Moscow aminiyar Iran ce ta kusa, kuma ta yi Allah-wadai da hare-haren Amurka da Isra’ila, waɗanda Tehran ta mayar da martani a kai ta hanyar harba makamai masu linzami da jirage marasa matuƙa kan ƙawayen Amurka da ke yankin Tekun Fasha.

A shekarar da ta gabata, ƙasashen biyu, waɗanda Yamma ta ƙaƙaba wa takunkumai masu tsanani, sun sanya hannu kan wata yarjejeniyar haɗin gwiwa mai faɗi, amma ba ta kai matakin yarjejeniyar tsaro ta haɗin gwiwa ba.

Wasu bayanai daga takardar da aka bayyana wa jama’a kawai ta ambaci cewa, Moscow da Tehran sun amince su taimaka wa juna wajen tunkarar “barazanar tsaro” ta bai-ɗaya, kuma ba za su ba da “taimako ga maharin” ba idan aka kai wa ɗaya ɓangaren hari.

Tun bayan ɓarkewar yaƙin, Rasha ta aike da agajin jin ƙai, amma ta ƙi cewa uffan a bainar jama’a game da irin tallafin da ta ba Iran, idan ma akwai.

Masu alaƙa