An kashe mana mutum 4, wasu 10 sun bace —Kungiyar Jama’atu

Kungiyar Jama’atu Nasril Islam (JNI) ta tabbatar da cewa an kashe mambobinta hudu, wasu goma suka bace a harin da aka kai Anguwan Rukuba da ke Karamar Hukumar  Jos ta Arewa ta Jihar Filato.

Akalla mutum 27 ne suka mutu a harin na daren ranar Lahadi, inda maharan da ke sanye da kayan sojoji kuma kan babura suka afka wa al’ummar yankin da misalin karfe 7:30 na dare, suka bude wuta kan jama’a.

Kungiyar JNI reshen Jihar Filato, bayan bincike da tattaunawa da al’umman Musulmi, an gano cewa mambobinta hudu sun mutu, yayin da goma ba a san inda suke ba tun bayan harin. Iyalansu sun ce ba su sake jin duriyarsu ba, kuma wayoyinsu a kashe suke.

Kungiyar ta ce an gano gawarwakin wadanda suka mutu ne a Asibitin Koyarwa na Jami’ar Jos (JUTH), yayin da wasu biyu ke jinya a asibitin. JNI ta yi ta’aziyya ga iyalan da abin ya shafa tare da kira ga jama’a da su kwantar da hankalinsu.

A ranar Talata Gwamnatin Jihar Filato ta sassauta dokar hana fita ta sa’o’i 48 da ta kafa a karamar hukumar bayan harin, inda Kwamishinar Yada Labarai, Joyce Lohya Ramnap, ta ce daga ranar 1 ga Afrilu, an sassauta dokar hana fita za ta kasance daga karfe 7 na safe zuwa 3 na rana.

A ziyarar da wakilinmu ya kai, ya lura cewa kasuwanni da manyan tituna sun kasance kufai, inda jami’an tsaro suka kafa shingaye da binciken ababen hawa.

Shugaban kasa Bola Tinubu ya umarci hukumomin tsaro da su kamo wadanda suka aikata kisan gillan a Filato da Kaduna, yana mai bayyana harin a matsayin ta’addanci da rashin imani.

Gwamnan Filato, Caleb Mutfwang, ya ce jihar ba za ta yi kasa a gwiwa wajen samar da tsoro ba, tare da umartar jami’an tsaro su tabbatar da hana zirga-zirgar babura a cikin Jos.

Majalisar Dattawa ta yi ta’aziyya ga iyalan da abin ya shafa, tare da kira ga kafa sansanonin soja a yankunan da ake kai hare-hare.

Ta kuma bukaci karin daukar jami’an tsaro da samar da agajin gaggawa ga wadanda suka rasa muhallansu.

Masu alaƙa