Ɗan bindiga daɗi ya harbe ɗan Najeriya a Kanada
[ad_1]
Rundunar ’Yan Sandan Toronto a ƙasar Kanada ta tabbatar da mutuwar wani dan Najeriya mai shekaru 46 bayan ɗan bindiga ya harbe shi a wata tashar motar bas da ke birnin.
’Yan sanda sun ce jami’ansu sun amsa kiran gaggawa kan harbin da aka yi da misalin karfe 7 na yammacin Lahadi, 4 ga watan Janairu, 2026, a tashar mota ta Yorkdale GO da ke kusa da titunan Yorkdale da Allen.
An gano sunan wanda aka kashe shi ne Osemwengie Irorere, dan Najeriya mai shekaru 46.
A cikin sanarwar da aka fitar a ranar Laraba, rundunar ta ce: “Rundunar ’Yan Sandan Toronto tana sabunta bayani ga jama’a kan binciken kisan kai. A ranar Lahadi, 4 ga Janairu, 2026, da misalin karfe 7 na yamma, ’yan sanda sun amsa kiran gaggawa kan harbin da aka yi a tashar mota ta Yorkdale.”
An ce wanda aka kashe da wanda ake zargi sun shiga bas ɗin GO a tashar, sai wanda ake zargi ya harbi wanda aka kashe a cikin bas ɗin kafin ya tsere a kafa.
Jami’an ’yan sanda da suka isa wurin sun tarar da wanda aka kashe yana fama da raunukan harbin bindiga.
An yi kokarin ceto rayuwarsa, amma daga baya aka tabbatar da mutuwarsa a wurin.
’Yan sanda sun ce sun kama wanda ake zargi bayan ɗan lokaci, tare da kwace bindigarsa.
Masu bincike sun ce tun da farko an kama Tyrel Gibson, mai shekaru 40 daga Toronto, wanda aka tuhume shi da laifin kisan kai.
Sanarwar ta ce: “Wanda aka kashe an gano shi da sunan Osemwengie Irorere, dan Najeriya mai shekaru 46. Masu bincike sun riga sun sanar da kama Tyrel Gibson, mai shekaru 40 daga Toronto. An tuhume shi da kisan kai.”
A cewar ’yan sanda, Gibson zai bayyana a gaban kotu a cibiyar beli ta Toronto a ranar Litinin, 5 ga Janairu, 2026.
Sanarwar ta kara da cewa: “An shirya ya bayyana a kotu a Toronto, a ranar Litinin, 5 ga Janairu, 2026, da karfe 9:30 na safe, a dakin shari’a na 105.”
Masu alaƙa
[ad_2]
Source link
