’Yan bindiga sun sa harajin N15m kan al’ummar Mazabar Sanata Tambuwal

Mazauna ƙauyukan Bazar da makwabtansu a Karamar Hukumar Yabo ta Jihar Sakkwato, sun koka cewa ’yan bindiga sun kakaba musu harajin Naira miliyan 15 tare da barazanar kai sabbin hare-hare idan ba a biya ba.

Wadannan ƙauyuka suna yankin Mazabar Sanatan Kudu ta Kudu, inda tsohon gwamnan jihar, Sanata Aminu Waziri Tambuwal, ke wakilta.

Wani mazaunin yankin, Dauda Umar, ya shaida wa manema labarai, cewa “abin yana da matuƙar tsanani” kuma yana buƙatar gaggawar kulawar gwamnati.

“Ina tabbatar muku cewa ’yan bindiga sun nemi Naira miliyan 15 daga gare mu, suka yi barazanar aikata mummunan abu idan ba mu biya ba. Ban san abin da za su yi ba kai tsaye, amma an riga an kakaba wannan haraji, wasu na tattauna hanyoyin tattara kuɗin,” in ji shi.

Dauda ya ƙara da cewa sabon harin ya faru ne a daren Juma’a misalin ƙarfe 11:40 na dare, har zuwa kusan 1:06 na safe.

“Sun sace mutane bakwai a harin, daga bisani suka saki shugaban ƙauyenmu da wasu mutum biyar, sun yi musu gargaɗi kada su kai rahoto. Suka yi awon gaba da shaguna suna ɗauke da kaya masu daraja miliyoyin naira,” in ji shi.

Mazauna sun yi kira ga Shugaban Karamar Hukumar Yabo da Gwamnatin Jihar Sakkwato da su ƙara tsaro a yankunan da abin ya shafa domin hana asarar rayuka da dukiyoyi.

“Mun riga mun kai rahoto ga hukumomi ciki har da ’yan sanda, amma muna buƙatar ƙarin taimako don magance wannan barazana,” in ji Dauda.

A makonnin baya, jaridar The Guardian ta ruwaito cewa mazauna Karamar Hukumar Kebbe ta Jihar Kebbe, sun roƙi Gwamnatin Tarayya ta ba su izinin ɗaukar makamai domin kare kansu, suna mai cewa yawan hare-haren ’yan bindiga ya sa al’ummomi zama a bayyane ba tare da cikakken kariya daga gwamnati ba.

A wani taron manema labarai a Sakkwato, shugabannin al’umma wadanda Alhaji Adamu Kebbe ya jagoranta, sun yi bayani kan tabarbarewar tsaro da ya yi sanadiyyar mutuwa da lalata dukiyoyi.

Sun zargi hukumomin jiha da ƙananan hukumomi da watsi da su, tare da cewa martanin jami’an tsaro kan hare-haren yana jinkiri kuma bai isa ba.

Wani mazaunin, Haruna, ya shaida wa manema labarai: “Ba za mu iya barci da idanuwanmu biyu rufe ba. Ana hallaka al’ummominmu, gwamnati tana yi mana kadan wajen kare mu.”

Masu magana a taron sun yi gargaɗin cewa idan ba a inganta tsaro ba, mutane za su ji tilas su ɗauki matakin kare kansu.

Sun kuma neman Gwamnatin Tarayya ta samar da tallafi kai tsaye ga ƙananan hukumomi domin su ƙarfafa kayan aikin tsaron al’umma da kuma amsa hare-hare cikin sauri.

“Idan ba za mu iya samun kariya daga gwamnati ba, to a ba mu damar kare kanmu,” in ji su.

Mai dangantaka