Amurka ta sassauta takunkumin da ta sanya wa man Iran don rage ƙarancin mai a duniya
Amurka ta sassauta takunkumin da ta sanya wa man Iran na ɗan lokaci, domin rage matsalar ƙarancin mai da ake fuskanta a duniya.
Wannan mataki ya shafi man Iran da aka riga aka loda a cikin jiragen ruwa kafin ranar Juma’a, 20 ga watan Maris.
An ce sassaucin zai ɗauki tsawon kwanaki 30 ne kacal.
Sakataren Baitul-malin Amurka, Scott Bessent, ya bayyana cewa matakin zai taimaka wajen ƙara man fetur a kasuwar duniya, inda ake sa ran za a samu kusan gangar mai miliyan 140.
An ɗauki wannan mataki ne saboda rikicin da ke faruwa a yankin Gabas ta Tsakiya, wanda ya jawo tangarɗa samar da man fetur.
Masana sun ce wannan sassauci zai taimaka wajen rage tashin farashin mai a kasuwannin duniya, kodayake na ɗan lokaci ne kawai.
Haka kuma, a baya Amurka ta taɓa sassauta irin wannan takunkumi kan man Rasha da ke kan teku, domin kauce wa matsalar ƙarancin mai.
Sai dai masana na gargaɗin cewa idan rikicin duniya ya ci gaba, matsalar makamashi na iya dawowa bayan wannan wa’adin ya ƙare.
Wannan lamari na nuna yadda siyasar duniya da rikice-rikice ke shafar tattalin arziƙi da rayuwar jama’a, musamman a ɓangaren makamashi.
