Harin Sakkwato: Amurka na kokarin mayar da Najeriya filin daga – Sheikh Gumi

Fitaccen malamin addinin Musulunci, Sheikh Ahmad Gumi, ya yi kira ga gwamnatin tarayya da ta dakatar da shigar sojojin Amurka cikin yaƙi da ta’addanci a kasar.

Malamin ya yi gargadin cewa hakan zai jawo hankalin masu adawa da Amurka zuwa Najeriya kuma ya mayar da ƙasar filin yaƙi.

Ya shawarci gwamnati da ta nemi taimako daga ƙasashen China, Turkiyiya da Pakistan wajen yaƙi da ta’addanci.

Gumi ya yi wannan kira ne a cikin wani rubutu da ya wallafa a shafinsa na Facebook na ainihi, inda yake martani kan harin sama da sojojin Amurka suka kai a jihar Sakkwato.

Yayin da ya amince cewa yaƙi da ta’addanci halal ne a cikin Musulunci, malamin ya gargadi cewa bai kamata a mika wannan aiki ga ƙasashen waje da ake da shakku a cikin niyyarsu ba.

“Halaka ’yan ta’adda wajibi ne a Musulunci. Annabi (SAW) ya yi fatan ya halaka su,” in ji Gumi, yana nuni da hadisin da Bukhari da Muslim suka ruwaito.

“Sai dai wannan aikin ya kamata a yi shi ne da hannaye tsarkaka, ba hannun wani ɗan ta’adda da ya jike da jinin dubban yara, mata da maza ba.”

A cewarsa, Najeriya na iya ƙara tsananta matsalolin tsaro idan ta bari Amurka ta yi aiki da sojoji a ƙasar.

“’Yan ta’adda ba sa yaƙi da ’yan ta’adda da gaskiya; abin da za su iya yi kawai shi ne kashe marasa laifi tare da boyayyun manufofi, bayan da’awar yaƙi da ‘ta’addanci’,” in ji shi.

“Idan Najeriya na son taimakon soja, China, Turkiyya da Pakistan za su iya yin aikin yadda ya kamata,” in ji shi.

“Shigar Amurka cikin Najeriya zai jawo hankalin ainihin masu adawa da Amurka, ya mayar da ƙasarmu filin yaƙi.”

Ya ƙara bayyana damuwa cewa hujjar Amurka na kai hare-hare da nufin “kare Kiristoci” na iya raba Najeriya bisa addini kuma ya lalata haɗin kan ƙasa.

Malamin ya yi kira da a dakatar da haɗin gwiwar soja da Washington nan take, yana mai bayyana manufofin Amurka a waje da matsayin mulkin mallaka, tare da gargadin cewa ’yan Najeriya kada su ruɗu da hare-haren sojojin su.

Yayin da yake mayar da martani musamman kan wurin da aka kai harin da kuma lokacin, Gumi ya tambayi manufar dabarun da ke tattare da shi.

“Hari a Sokoto, inda sama da kashi 90 cikin 100 Musulmai ne kuma babu barazanar ta’addanci a halin yanzu, alhali barazana ta gaskiya tana Maiduguri, kuma a daren Kirsimeti, da ikirarin kare Kiristoci daga kisan gilla, ya nuna abubuwa da dama,” in ji shi.

Masu alaƙa