Dan kunar bakin waken Boko Haram ya kashe sojoji 5 a Borno

Wani ɗan kunar bakin wake ya kai hari da mota cike da bama-bamai kan jerin gwanon sojoji a yankin Timbuktu na jihar Borno a ranar Talata, inda ya hallaka sojoji biyar tare da jikkata wasu da ba a san adadinsu ba.

Majiyoyin tsaro sun tabbatar wa Aminiya cewa jami’ai biyu masu mukamin Manjo da wani Laftanar na cikin waɗanda abin ya ritsa da su.

“Harin ya lalata kayan aikin sojoji da ake amfani da su wajen kai hare-hare da kare kai a cikin aikin share sansanonin ’yan ta’adda da ake yi tsawon makonni,” in ji wani soja.

An ce ’yan ta’addan sun yi amfani da motar da aka makare da bama-bamai wajen afkawa kan jerin gwanon sojoji.

Rundunar ta dawo daga wani aikin share sansanonin ’yan ta’adda da ya yi nasarar tarwatsa sansanonin da dama da kuma kashe da yawa daga cikinsu lokacin da harin ya auku.

“Eh! Kowane aiki yana da kalubale, amma mun ci gaba da yin nasara. Abin takaici, mun rasa sojoji biyar a lamarin. Manga (Kwamandan) yana cikin koshin lafiya kuma aikin yana ci gaba,” in ji wani jami’i da bai so a bayyana sunansa ba.

An ce motocin sulke da na kayan aiki sun lalace lokacin da motar da aka cika da bama-bamai ta afkawa jerin gwanon.

Wakilinmu ya gano cewa an kai gawarwakin sojojin Maiduguri, yayin da jami’an da suka jikkata aka tafi da su asibiti domin kulawa.

Yankin Timbuktu dai ya shahara da hare-haren kwanton bauna. A nan ne ’yan ta’adda suka kama Birgediya Janar Musa Uba kuma suka kashe shi.

A ranar Litinin, dakarun Operation HADIN KAI sun bayyana cewa sun share sansanonin ’yan ta’adda da dama tare da dakile hare-haren jiragen sama a yankin.

A cikin wata sanarwa, mai magana da yawun rundunar, Lt-Col Sani Uba, ya ce a ranar 18 ga Janairu, 2026, dakarun sun yi amfani da bayanan sirri wajen kai farmaki a sansanonin ’yan ta’adda da aka gano a Chilaria, Garin Faruk da Abirma, tare da hadin kan rundunar sama da ta ba da bayanan leƙen asiri kai tsaye.

An kwato abubuwa da dama masu muhimmanci, ciki har da rediyo, wayoyi, mujallu na AK-47, harsasai, tutocin Boko Haram/ISWAP, kayan magani, buhunan hatsi, mota, wurin ajiya a ƙasa da kuma tankunan mai.

Masu alaƙa